Plan de estudos

O Módulo Básico impártese durante o primeiro curso do Grao e inclúe 60 créditos ECTS de materias de formación básica para que o alumnado adquira, partindo de coñecementos previos dun nivel correspondente a bacharelato, unha formación básica en ciencias, con maior énfase en Química, que lle permita comprender e adquirir os coñecementos e habilidades a desenvolver en módulos máis especializados.

O Módulo Fundamental está constituído por 108 créditos ECTS obrigatorios que conforman o núcleo esencial da Química e que abarcan as materias de Química Analítica, Química Física, Química Inorgánica e Química Orgánica. Estas materias impártense en materias de 6 ECTS, distribuídas de maneira homoxénea ao longo dos cursos segundo e terceiro, xa que se considera que esta distribución facilita a adquisición das competencias polo estudantado.

O Módulo Complementario de 24 ECTS de carácter obrigatorio inclúe materias estreitamente relacionadas coa Química como Enxeñaría Química, Bioquímica e Química de Materiais. Seguindo as recomendacións do Libro Branco da ANECA, neste módulo tamén se inclúe a materia Proxecto, xa que se considera que unha das atribucións profesionais dos químicos é redactar e executar proxectos relacionados coa Química. As materias deste módulo desenvólvense nos cursos segundo e terceiro e o primeiro cuadrimestre de cuarto curso.

O Módulo Optativo distribúese entre os dous cuadrimestres de cuarto curso e permite ao alumno a posibilidade de cursar 30 ECTS en materias optativas para profundar e ampliar coñecementos e competencias en aspectos máis especializados da Química. Como se indicou anteriormente, neste módulo inclúese a posibilidade de realizar prácticas externas que permitirán que os alumnos establezan un primeiro contacto co ámbito laboral co obxectivo de potenciar a súa empregabilidade. As materias optativas organizáronse en dous itinerarios, que darán a posibilidade ao alumno obter unha entre dúas mencións. Por unha banda, os contidos da mención “Química Avanzada” están orientados a profundar en aspectos avanzados da Química e a presentar aos perfís profesionais máis relacionados coa docencia e a investigación. Doutra banda, a mención “Química Aplicada” profunda naqueles contidos químicos aplicados á industria e aspectos máis aplicados da Química e complementa a formación dos futuros graduados en aspectos profesionais. Debe indicarse aquí que tamén se proporciona a posibilidade de que os alumnos non opten por ningunha mención e escollan 30 ECTS de materias optativas sen cinguirse a ningún patrón específico.

O Módulo Traballo de Fin de Grao atópase no segundo cuadrimestre de cuarto curso e dedícase á realización do Traballo de Fin de Grao cuxo obxecto é demostrar, de forma integrada, que se adquiriron as competencias propias do graduado en Química. O Traballo de Fin de Grao establécese en 18 ECTS de carácter obrigatorio, o que tamén permite aspirar a solicitar a etiqueta de EuroBachelor en Química para o título.